PRĀNCIS   ARELLIS

1919 – 2008

Prāncis Arellis (Laītawiskai Prancìškus Erẽlis), prusīns ezze mettu 1988, wērsas "Etwērpjais brāti" be kitēisan autōrs, gimma 1919. mettas 16. uktōberin en kāimu Senassis Ōbelins (Šilallis pulka) en Laītawai. Mukinnuns si en Plungis kapucīniskasmu gimnāzijan, kwei labbai erzināwuns si sen latīniskan. Latīniskan billin mukēi en wissans panzdaumans gīwatas mettans.

Pa gimnāzijan enmatrikulīwuns si en Wīdetautas Debbas Uniwersitātis medicīnis fakultātin, kan wanginnuns en mettu 1945. Ērgi mettan 1949 bēi stesses fakultātis laktōrs. Ezze 1949 ērgi 1958 mettan dīlai en Mažeīkemans kāigi terapījas šlaitīnsenes wediks en mīstas špitlu. En mettamans 1958–1963 tāns bei Šaūlin klīnikiskas, be en 1963–1965 – Wilnis klīnikiskas špitlas galwas terapeūts. En mettamans 1965–1975 tāns dīlai en Eksperimēntiskas be klīnikiskas medicīnis institūtu. Ezze 1975 ērgi 1994 skaitāwuns lakciōnins en Wilnis Uniwersitātis fakultātei per izwanginsnan stēisan ārstin, kwei habilitīwuns si (profesōrs ezze mettu 1979). Tenesse izlaukīsnas skrits bei epidemiolōgija stēisan reumātiskan enwārgsenin en Laītawai.

Tenesse hobby bei billas, šlāitewingi – lattawisku be prūsisku. Peisāi wērsans. Mazzibūtwei tāns bei ainunts nilingwists en pastippai Laītawan, kas labbai enstudīwuns wissans wūrans pamīntlins stesse prūsiskan, minijja eraīnan wuraprūsiskan wīrdan. Supnaūwintei, kelli mazīngi etwārtai wartīntun prūsiskan billin en gīwatan, tāns bandāwuns kurtun baltiskan (laītawiskan–lattawiskan–prūsiskan) waiţāsnas lāiskan.

En mettu 1988, 16. februāran, ēmpiri sen M. Klussin, J. Trinkūnan, H. Sambōran, W. Šillin, gruntina en Wilnei pirman "Prūsas" klubban. Panzdau bēi wisēisan prūsiskas bangīsnas fōrmin delīkasimiks, stesses Brātrijas be tēntiskas bangīsnas stēisan prūsiskan pīran. Kōrespōndija prūsiskai sen deiwūtiskan Brātrijas Kānclarin Dailūnan Russinin: Russinis tenginnuns tenesmu swajjans, be Arellis Russiņu swajjans prūsiskans wērsans. Iz stan kērdan ast pergūbuns zmūnints Arellas wērss "Etwērpjais brāti". Arellas panzdauma ēndija en prūsiskan bangīsnan, sen Klussin draugā "Prūsiska chrestōmatija", izgūbi en Kaūnu en 2007.

Prāncis Arellis ast delli lāiskan autōrs. Šlāit medicīniskans (tenesse gīwatas dīlin "180 reimātiskai enwārgsenei" izgūbi en 1998), mazzimai paminītun gīwatas empīrinsnan en wērsamans "Septinnei gīwatas etrapāi" (laītawiskai, 1999) be tautāzinaniskan "Interesantī Laītawa" (laītawiskai, 1997). Tenesse prūsiskai be laītawiskai wērsai "As kwai en grīmikans peisātwei" izgūbi en 2003.

Prāncis Arellis bei ginewīngi, ōptimistiskan, pōzitiwan be aktīwan ērgi wangan. Tenesse ēndija be tenesse emmens wīrst palikkus en prūsiskai baingīsnan ikkai tenā subba wīrst palikkus.

Mikkels Klussis